Rəqəmsal texnologiyaların sürətli inkişafı iqtisadi münasibətlərin xarakterini də əhəmiyyətli dərəcədə dəyişib. Elektron ticarət, sosial media platformaları, onlayn xidmətlər və rəqəmsal məzmun istehsalı artıq iqtisadiyyatın mühüm tərkib hissəsinə çevrilib. Bu proses yeni gəlir mənbələri formalaşdırmaqla yanaşı, iqtisadi fəaliyyətlərin dəqiq uçotunun aparılmasını və müasir biznes modellərinə uyğun vergi inzibatçılığının qurulmasını zəruri edir.
Dəqiq uçot həm iqtisadi proseslərin obyektiv qiymətləndirilməsinə, həm də sahibkarlıq subyektlərinin fəaliyyətinin hüquqi müstəvidə tanınmasına xidmət edir. Eyni zamanda, şəffaf uçot vergi öhdəliklərinin düzgün müəyyənləşdirilməsinə, sağlam rəqabət mühitinin formalaşmasına və rəqəmsal iqtisadiyyatın dayanıqlı inkişafına mühüm töhfə verir.
Müasir rəqəmsal biznes modellərinin
uçot sistemində düzgün əks olunması şəffaflığı artırır
Uçotun dürüstləşdirilməsi vergi münasibətlərində şəffaflığı artırır
Son illər İqtisadiyyat Nazirliyi yanında Dövlət Vergi Xidməti rəqəmsal iqtisadiyyatın inkişaf tempinə uyğun olaraq vergi inzibatçılığının müasirləşdirilməsi və uçot sisteminin təkmilləşdirilməsi istiqamətində müxtəlif islahatlar həyata keçirir. Bu islahatların əsas məqsədi yeni iqtisadi fəaliyyət formalarının qanunvericilik çərçivəsində tanınması, uçotun daha dəqiq aparılması və vergi münasibətlərində şəffaflığın artırılmasıdır.
Müasir rəqəmsal biznes modellərinin uçot sistemində düzgün əks olunması şəffaflığı artırır, iqtisadi qərarların daha etibarlı məlumatlar əsasında qəbul edilməsinə imkan yaradır və vergi ödəyicilərinin hüquqi təminatını gücləndirir. Eyni zamanda, uçotun dürüstləşdirilməsi vergi intizamının möhkəmlənməsinə və könüllü əməletmə səviyyəsinin yüksəlməsinə də müsbət təsir göstərir.
“Rəqəmsal platforma təsirçisi” fəaliyyət kodunun tətbiqi
rəqəmsal iqtisadiyyatın inkişafına uyğunlaşan müasir vergi inzibatçılığının
formalaşdırılması istiqamətində atılmış mühüm addımdır
“Rəqəmsal platforma təsirçisi” – yeni şəffaflıq həlli
Rəqəmsal iqtisadiyyatda baş verən dəyişikliklər nəzərə alınaraq, Dövlət Vergi Xidməti uçot məlumat bazasında fəaliyyət növləri təsnifatına “Rəqəmsal platforma təsirçisi” adlı yeni fəaliyyət növünü əlavə edib. Bu yenilik həm vergi ödəyicilərinin fəaliyyətinin qanunvericiliyə uyğun rəsmiləşdirilməsini asanlaşdırır, həm də vergi öhdəliklərinin şəffaf və vaxtında yerinə yetirilməsini təşviq edir. “Rəqəmsal platforma təsirçisi” fəaliyyət kodunun tətbiqi rəqəmsal iqtisadiyyatın inkişafına uyğunlaşan müasir vergi inzibatçılığının formalaşdırılması istiqamətində atılmış mühüm addımdır. Bu yenilik şəffaflığın artırılmasına, könüllü vergi əməletməsinin təşviqinə və rəqəmsal sahibkarlığın hüquqi müstəvidə daha sağlam əsaslarla inkişafına töhfə verir.
Bununla yanaşı, yeni təsnifat rəqəmsal iqtisadiyyatın real həcminin qiymətləndirilməsi, bu sahədə məşğulluğun və iqtisadi aktivliyin statistik uçotunun təkmilləşdirilməsi, eləcə də gələcək dövlət siyasətinin daha dəqiq məlumatlar əsasında formalaşdırılması baxımından da əhəmiyyət daşıyır. Yeni mexanizm rəqəmsal iqtisadiyyat üzrə statistik məlumatları daha dolğun formalaşdırmaqla yanaşı, rəqəmsal reklam və təsirçi (influenser) marketinqi sektorunun inkişafının qiymətləndirilməsi və bu sahədə dövlət siyasətinin formalaşdırılması üçün etibarlı məlumat bazasının təmin edilməsinə töhfə verir.
Mənbə: vergiler.az
